Tufala tebol tenis pleia blong Vanuatu, Yoshua Shing mo Ham Lulu i no bin tren afta long Pacific Mini Games long Disemba las yia be tufala i kivim gud jalenj mo ranawe wetem ol medal long Oceania Cup mo Fiji Open long las wiken.

VBTC Sports i kasem ripot se tufala tenis pleia i yusum expiriens nomo blong shine long 3 dei kompetisen ia we i tekem ples long Suva, Fiji.

I gat ripot se Vanuatu Table Tennis Federation i no save ranem ol trening prokram blong ol atlet blong hem olsem pass yia from se i nokat ples blong oli tren long hem.

Long ITTF-Oceania Cup long single kompetisen, Yoshua Shing i finis long semi faenol mo Ham Lulu long kwota faenol raon.

Long dabol kompetisen, Ham mo Yoshua i mekem kasem faenol mo New Zealand tim i win mo tufala i karem silver medal.

Long saed blong mix dabol, Ham Lulu i pair wetem Carolyn blong Fiji mo tufala i winim silver medal.

Fiji Open singles kompetisen faenol risal, Ham Lulu i faet kasem faenol mo hemi lusum mo hemi ranawe wetem silver medal.

Tufala tebol tenis pleia i kam bak long Vanuatu long wik ia.