Futbol long kantri no muv i go long foret or divelop blong smol taem naoia from Vanuatu Football Federation i go tru long rifom sins long 2017 blong mekem sua se hemi alaen wetem FIFA rifom we hemi mein sos blong funding blong hem.

Hed ofis blong Vanuatu Football i mekem toktok ia tru long wan pres rilis blong ansarem tumas komplen blong pipol long pua pefomens blong Nasonal U-19, sinia woman tim mo U-16 tim.

VFF i explenem se rifom ia i gat ifekt long okonaesesen blong hem bigwan be hemi asurem evriwan se i no longtaem bambae ol samting i kam nomol bageken.

Hemi explenem se FIFA i bin banem VFF smol taem sins long 2016 mo oli liftimap ban ia long February 2018.

Anda long niu FIFA rifom ia, VFF i bin saenem wan niu kontrak blong agri long ol objektiv we FIFA i setem long 2017 mo praemeri fokas blong rifom i blong impruvum gavnans mo faenansel manejmen.

Situesen ia i fosem VFF blong mas stopem yut divelopmen prokram mo daerektem fund i go long preparesen blong sinia tim from Pacific Mini Games.

Vanuatu Football i akseptem ifekt blong kompetisen risal we Vanuatu i stap ffeisem naoia be hemi talem se hemi blong short taem nomo.

Hemi preisem FIFA blong continue sapotem futbol long kantri mo bambae i kat moa niu divelopmen VFF i save anaonsem i no longtaem.