Majistret Kot blong Vanuatu bae i sidaon long Prilimineri Inquari PI long mande nekis wik blong disaedem deit blong harem apil kes ova long jifli taetol blong olfala Tari-nuamata.

Kleimant blong jifli taetol ia hemi, John Jack, mo Difendent blong kes, hemi Joseph Luen Tari-nuamata XII (12).

Long manis May 2018, Efate Aelan Kaonsel blong ol jif i riferem kes blong jifli taetol - Tari-nuamata i ko blong Tongoa Aelan Kaonsel blong ol jif blong disaedem, mo i givim 30 dei blong apil.

Be grup blong Joseph Luen we i holem jifli taetol ia - Tari-nuamata naoia, i apilim disison blong Efate Aelans kaonsel blong ol jif se kes ia bae oli mas stretem nomo long aelan blong Efate folem nomo wan disison blong Efate aelan kaonsel blong ol jif long 2009.

Ripot i talem se long namba 16 Oktoba 2009, Efate Aelan Kaonsel blong ol jif i alejli diklerem se 'Tari-nuamata' mo 'Tariwer' tufala i orijinoli blong Efate.

Beis long disison blong 2009 ia, oli disaedem mo apilim i ko long majistret kot se jifli taetol blong Tari-nuamata oli mas stretem nomo long aelan blong Efate.

Long tedei moning tuketa pati i stap long foret blong Majistret Kot bilding long Port Vila, be jaj blong majistret kot we i sapos blong harem Prilimineri Inquari ia, i stap naoia long aelan blong Tongoa mekem se oli muvum iko long mande nekis wik.

Loya we i ripresentem Difenden, Joseph Luen Tari-nuamata, hemi, Daniel Iawa, mo Loya we i ripresentem Kleimant, John Jack, wan long ol pikinini blong Joseph Luen, hemi William Timakata.