Wellness mix bij volibol tunamen we Telecom Vanuatu Limited mo Volley4Change i okonaesem bambae i kik statem kompetisen blong hem long tumoro aftanun.
VBTC spot i kasem ripot se i gat 29 tim evriwan mo oli kamaot long difren bisnis haos long Port Vila blong part long tri dei tunamen ia we bae i tekples long Stade bij volibol kot.
TVL mo Volley4change i plan blong ranem mix bij volibol kompetisen ia ia long evri yia.
Bigfala tingting blong tunamen ia hemi blong promotem health blong wanwan staff blong wan wokples mo hemi empawarem olgeta blong save wok tugeta.
Bij volibol tim blong Vanuatu we bambae i go long Tokyo Japan bambae i part long Wellness bij volibol kompetisen ia.
Tumoro hemi opening blong event ia mo bai i klos long namba 27 long manis ia.