Promotem man ples long rowing spot hemi nambawan priority blong Vanuatu Rowing Association divelopmen prokram we i stap tekem ples long Port Vila evri wik.
Hemi wan klia pathway we Vanuatu Rowing i tekem blong sapotem man, woman, yangfala mo pipol wetem disability long rowing spot prokram blong hem.
Spot federesen i pointemaot se tru long prokram blong hem, i no longtaem i pass two lokol rowa i pruvum se Vanuatu i save mekem blong kompit long intanasonal kompetisen.
Tufala brata, Risu mo Rio Rii i go kompit long Europe mo pefomens blong tufala i sapraesem fulap divelop kantri long saed blong spot disiplin ia.
Risu i bin mekem personal best blong hem long Czech Republic mo Rio i winim gold medal long Komanwelt Rowing Beach Sprints Championship long England las manis.
Rio Rii i stap kompit long World Rowing Championship we i stap gohed long Bulgaria long wik ia.
Port Vila Rowing Club we i stap ranem rowing trening i stap invaetem yangfala boy mo gel blong tekemap jalenj ia.