Asembli blong God jioj i lukim wan moa milestone, tru long patnasip blong AOG Vanuatu, New Caledonia mo Franis.
Wan saening i bin tekem ples long moning tedei, long Port Vila, bitwin Generol Suprintenden blong AOG Vanuatu, Mission Daerekta blong New Caledonia mo Jeaman blong Misineri depatmen blong AOG France.
Generol Suprintenden blong Vanuatu,Pasta Walu Robert Napris, i talem se saening emi blong wan patnasip, we bai i lukim trifala i wok tugeta long tim spirit blong ensuarem se evri reis blong pipol i save lukim JESUS long laef blong olgeta.
Fes patnasip emi bin wetem Unaeted Stet blong America, USA, mo naoia wetem Franis, long Europe.
Representetif blong AOG Franis, Pasta Jean-Luc Zolesio, emi talemaot se depatmen blong hem i wok wetem samples 30 kaontri, mo long wei ia oli stap helpem evri man mo woman long ol teritori ia.
Long said blong representatif blong New Caledonia, Pasta Christophe Kalo i talem se emi wan impoten wok we AOG i stap blong mekem, hemia blong mekem ol disaepol bifo JESUS i kam bak.
Olgeta we oli stap blong witnesem impoten milestone blong AOG jioj ia emi ol presbetrii blong olgeta 6 provins blong Vanuatu, mo ol memba blong nasonal eksekutif blong jioj long Vanuatu mo New Caledonia.