Wan tim blong ol volentia blong Red Cross long Penama i finemaut se bae ino kat inaf bilding blong cater from ol komuniti blong Maewo mo pipol blong Ambae, we i stap long Maewo naoia, sapos i kat wan cyclone.

Vanuatu Red Cross Society i ripotem se hemia hemi wan long olketa finding we ol volentia blong Red Cross long Penama i finemaut, afta long assessment we oli mekem long ol wik we i pas.

Long visit ia, tim ibin inspektem ol seif senta, olsem ol nakamal, jioj haus mo ol komuniti hall stat long north kasem long south Maewo.

Mo tim i finemaut se long sam evacuation senta, ino kat wan seif senta blong pipol i save ko long hem long taem blong wan cyclone.

Red Cross i ripotem se everi infomesen we tim i kolektem long assessement ia, bae oli kivim long Shelta Klasta tim blong lukluk moa long hem.

Pablik Woks nau i hedem Shelta Klasta tim.

Assessmen ia i tekem ples from Vanuatu i stap ko from cyclone season, mo wan long olketa mein aktiviti blong Vanuatu Red Cross Society hemi blong priperem ol komuniti blong pripea from eni natural disasta.