Yang top rowa blong Vanuatu, Rio Rii i kasem bak kantri long yestede naet afta we hemi spendem moa long wan manis long Europe.
Long fes rowing kompetisen blong hem long England hemi winim gold medal long man single scull event.
Hemi festaem long histri blong wan lokol rowa i winim wan medal long Europe mo hemi posibol tru long plante komitmen we Rii i mekem long ol trening preparesen blong hem.
Yangfala blong Santo ia hemi continue blong tren long Italy mo long las wik hemi kompit long World Rowing Championships long Bulgaria.
Long jampionsip ia hemi manej blong klokem personal best time blong hem we hemi 7:36 minit.
Koj blong Rio, Andrew Mackenzie i talem se blong kompit long wol rowing jampionsip i wan gud expiriens blong hem from hemi lanem plante samting we bae i helpem Vanuatu Rowing blong impruv mo kompetitiv akensem bigfala kantri.
Koj i se oli planem next kampein finis we hemi 2 yia intens trening preparesen tuwods Tokyo 2020 Olympic kems.
Long tede 1 oklok aftanun bae Vasanoc i holem wan pres konfrens blong Rio Rii mo koj blong hem.