Evri futbol klab we oli rejista long wanwan memba asosiesen truaot long klantri bambae oli mas gat laesens stat long 2019 blong oli kam rikonaes.

Vanuatu Football Federation i talem se hemi wan niu rikwaemen we Oceania Football Confederation i putum mo instraksen ia i go long evri memba asosiesen finis blong oli stat wok long hem.

Hemia sam long ol rikwaemen we ol rejista klab i mas gat wan propa administresen mo wan aktiv exekutiv komiti.

Klab i mas gat wan futbol divelopmen prokram blong hem stat long U-10 i go antap kasem U-16 kategori.

Hemi mas gat wan koj we i gat C or B laesens setifiket mo klab i mas onem wan fil blong mekem se i nokat distebens long prokram blong hem.

VFF i mekem i klia tu se eni klab we i kwalifae long OFC Champions League i no mitim ol rikwaemen ia bae hemi no save go kompit long rejinol futbol tunamen ia.

Hemi advaesem ol primia divisen klab long Port Vila mo long Luganville taon blong stat putum long aksen ol tingting ia naoia mo taem 2019 i kam oli well setap finis.