Ol memba blong Komuniti blong Ambae we oli stap naoia long eria blong Banban long Santo oli kohed blong kliarem ol bus mo divelopem komuniti blong olketa.
I kat 227 haoshold blong ol evakuiis blong Ambae oli liv long eria blong Banban, klosap long Luganville Taon.
Long eria blong Bombua i kat 147 haoshold mo hemi namba 2 haes namba blong ol haoshold we oli mekem namba 2 hom blong olketa long hem.
Ova long 1,500 haohold we oli ko mekem namba 2 hom blong olketa long aelan blong Santo mo sam long ol haoshold ia oli liv nomo long ol eria blong difren jej long period blong Steit blong Imejensi.
Be long olketa we oli tekem disison blong olketa blong bildim namba 2 hom blong olketa, oli kohed blong kliarem ol bush blong bildim ol temporeri haos blong olketa.
Wota hemi wan jalens long ol niufala eria ia, be WASH klasta blong Nasenal disasta Manejmen Ofis i mekem ol wok blong provaedem wota i ko long ol evakuii ia.
VBTC nius i andastandem se naoia plande wok i kohed finis long ol difren eria blong Santo blong divelopem namba 2 hom blong olketa long on-kost blong olketa folem tinktink blong Gavman blong Vanuatu blong i mas kat namba 2 hom.