Unaeted Kingdom UK emi kontiniu blong helpem Vanuatu long said blong Nesen Building.
Deputy British Hae Komisina we i beis long Honiara, Solomon aelan, Paul Dryden, i stap long Vanuatu long wik ia blong invaetem ol pipol blong aplae from Chevening Skolaship.
Long toktok blong hem, Deputy Komisina, Dryden i talemaot se i bin gat 15 ni-Vanuatu finis we oli benefit long skolaship ia. We i inkludim tugeta ol man mo woman.
Ol pipol ia oli fomem alumni blong Chevening we Chairman blong hem hemi Loya Edward Nalial.
Nalial we emi bin karem Masta Digri blong hem long Pablik mo Intanasonal Loa long UCL long London, long 2002, i talem se emi wan life changing eksperiens.
Wan memba blong Chevning alumni blong Vanuatu, Fred Samuel i bin ko karem Masta Digri blong hem long Telekomunikesen long Coventri Univesiti.
Mo em i talemaot se skolaship ia emi helpem olgeta bigwan long said blong karia blong olgeta.
Mo hem i stap enkarejem ol pipol blong Vanuatu blong aplae from.