Vanuatu i stap naoia long United Nations General Assembly mo stampa tinktink blong delegeson ia, hemi blong reisem long UN level se Vanuatu i kat tinktink blong putum wan draft resoluson i ko long UN Jenerol asembli long nekis yia 2019 blong lisitim West Papua i ko long list blong Dikolonaseson blong United Nations.
Praem Minista Charlot Salwai Tabimasmas i lidim 2-man delgeson, inkludum Minista blong Forein Afea, intanasenal kopereson mo extenol tred, Ralph Regenvanu i ko representem Vanuatu long namba 73 sesen blong UN jenerol asembli ia.
Sesen ia i bin open long namba 18 septemba, long Wednesdei las wik.
Fes dei blong hae level generol debate bambae i stat long tete 25 Septemba, 2018 mo bambae i go hed blong 9 dei blong wok.
Presiden elekt blong namba 73 asembli ia, Maria Fernanda Espinosa Garces, i bin anaonsem, long July yia ia, se thim blong 2018 emi "Making the United Nations Relevant to All People: Global Leadership and Shared Responsibilities for Peacful, Equitable and Sustainable Societies."
Long yestedei 24 Septemba, UNGA i bin holem wan hae level plenari miting long said blong Globol Peace, long honarem 100 yia since birth blong Nelson Mandela.
Miting ia oli kolem Nelson Mandela Peace Samit.