Tufala sinia pleia blong Vanuatu, Jacky Reuben mo Alex Saniel i kasem bak kantri long wik ia afta long tri manis trening camp we tufala i atendem long Yunnan Province long China.
Kapten blong Erakor Golden Star, Jacky Reuben mo straeka blong Sherpherds United, Alex Saniel i ripotem long VBTC spot se tufala enjoim bigwan ol trening we oli gat wetem sam klab mo long futbol akademi blong olketa.
Tufala pleia i travel i kam long Vanuatu wetem boss blong wan profesonal klab long supa lik blong China.
Man China ia i kam blong helpem tufala pleia blong save karem Chinese visa mo afta bae hemi go bak.
Plan i stap blong Jacky mo Alex bae i go bak long China long manis Disemba from pri-sisen bifo jampionsip i stat long February 2019.
Yianbian Funde FC i intres blong saenem tufala pleia.