Ol market vendor long Port Vila Market aos bae oli save kasem gud access long information tru long wan new PA System.
Long Friday las wik, wan niufala PA system i install olsem pat blong UN Women market for Change wetem tinktink se communication i playem wan impoten role blong mekem sua se market ples i sef, promotem gender equaliti mo empowerem ol woman.
Andrew Titus olsem Acting Market Manager i talem se taem TC Pam i kam long yia 2015, i destroyem PA system we i bin stap mo fulap taem oli stap usum ol voice blong olgeta blong singaot mo talem ol toksave mo awareness we samtaem hemi disturbem mo mekem ol customa we oli kam long market aos i fraet, especially nao ol visita.
VBTC News i kasem information tu se plante taem olgeta woka long market aos i faenem i hard blong communicate wetem ol market vendor.
Hemi talem se wetem niufala PA system ya, olgeta toksave i save kasem everi market vendor long everi cona blong aos market.
Ol market vendor i talem se fulap taem oli stap miss aot long ol impoten announcemen from oli no stap save be wetem niufala PA system ya bae i help bigwan.
Alison George, fes Secretary long Australian High Commission i talem se gavman blong Australia hemi hapi blong sapot projek ya.
Hem ya i made possible tru long funding long gavman blong Australia wetem sapot blong Port Vila Municipal Council(PVMC) mo Port Vila Market aos.