P&O Pacific Partnership long Sydney, Australia i mekem komitmen blong sapotem Vanuatu woman bij volibol tim long kampein blong hem blong kwalifae long Tokyo 2020 Olympic kems.
Vanuatu Volleyball Federation i ripotem se intres blong cruise liner kampani ia i kam strong taem hemi luk Vanuatu i winim fes bronze medal long Komanwelt Kems long Gold Coast long eli yia ia.
Hemi explenem se partnership ia i lukim tim i karem faenansel sapot tru long voluntia kontribiusen blong P&O Cruises pasenja we i helpem Miller Pata mo niu pair blong hem Sheresyn Toko blong kompit long ol intanasonal events blong mitim taf kwalifae rikwaemen.
P&O Cruise blong Australia i sevesem Pacific 85 yia finis i bin sapotem Vanuatu tim long akomodesen cost aotsaed long kem vilij long taem blong Komanwelt Kems.
Kampani ia i tekemap woklod blong tim long taem ia from Miller Pata i bin travel wetem smol boy blong hem mo hemi no save stap long kem vilij so oli mas slip aotsaed.
End risal blong hem, Miller Pata mo Linline Mansale i winim bronze medal.
Tokyo 2020 kampen blong Vanuatu i stat long Asian Beach Volleyball Championship long Thailand long wik ia.