Futbol long Europe i kam moa interesting mo semtaem exciting blong folemap from i gat mix risal blong ol top lik klosap long evri wik mo hemi soem klia se futbol i kam antap bigwan.
Long La Liga long Spain festaem we Television blong Vanuatu i stap rileim laef ol match blong hem long wik.
Long yestede moning tufal top klab, Barcelona mo Real Madrid i lusum match blong tufala.
Leganes we i bin kakae wan hevi sko long 4-1 akensem Real Madrid long las wik i kam bak strong mo winim jampion blong La Liga, Barcelona long 2-1 mo Sevilla i aotem Real Madrid long 3-0.
Risal blong nara match Valencia mo Celta Vigo i kitkit long 1-1.
Long tede i gat 2 match Valladolid vs Levante mo Girona i plei Real Betis FC.
Latest standings afta long ol match blong tede, Barcelona i topem mo Real Madrid seken mo tufala i serem 13 poin, Athletico Madrid long namba 3 ples wetem 11 poin mo Sevilla long 4th posisen.