Submarine Cable owner mo operator Interchange Limited, i cutum daon price blong submarine cable i go long tufala telecommunication operator long kaontri, Digicel mo Telecom Vanuatu Limited i go down long  42 percent i no longtaem.
VBTC News i kasem information se commercial deal ya i kam bitwin Vanuatu Telecom provider mo Interchange blong startem wok blong wan moa niufala cable.
Andrew Middlebrook olsem Regional Sales Manager i tok mo long hem.
VBTC news i understanem se Vanuatu i connect feswan i go long Fiji long Submarine cable long yia 2014, mo i linkim kaontri wetem saotern cross cable we i connect long United states, Australia mo New Zealand.
VBTC News i kat kwesten se wetem reduction ia, weta tufala operator bae i katem daun internet bundel long ol kastoma blong tufala.
Mr Middlebrook i talem se TVL mo digicel i cutum daon ol price plante.
VBTC News i traem blong kasem ol authoriti blong TVL mo Digicel be ino possible.
Be VBTC News i bin kontaktem Reguleta blong Telecommunication, Radio Communication, Broadcasting Regulator,  TRBR mo kasem rispon se ofis blong hem i no kasem ol statistik long pesentej ridaksen ia, so hem i no save konfemem.
Long andastanding blong hem 42% ridaksen ia emi aplae long evri opereta, ino Digicel mo TVL nomo.
Miss Baniala i talem tu se Ridaksen ia i bin hapen from we hem olsem reguleta i bin odarem Intachange mo FFC long namba 3 mo 4 kwota blong 2017, blong ridusim price, beis long ol holsel level blong telekomunikesen mo ICT long market.
Reguleta i talem se folem ridaksen ia, TVL mo Digicel tugeta i daonem ol praes blong tufala, espesli nao long said blong ol amaont o volume blong data we oli ofarem long ol prepaid mo postpaid kastoma blong tufala.
Hem i mensenem advetaesmen we Digicel i putum long daily post blong talem se kastoma i save kasem 5 taems blong data long 1000vt nomo, ova long 1000 megabite.
TVL tu i advetaesem Dabol Data blong 1.1 gigabite long 350vt nomo wetem free facebook.
Miss Baniala i kontiniu se ol pipol long Vanuatu i save aksesem 4G data netwok long Port Vila,  Luganville mo tu ol nara mein aelan, olsem Malekula, Pentecost, Tanna,mo Santo.
Mo tu 3G netwok kavarej emi ova long full kaontri.
Hemi talem tu se ol pipol i save lukim tu se folem hemia tufala telekom opereta ia oli stap rolemaot fulap moa sevis blong tufala aotsaed long Port Vila, espesli long 3 mo 4 G.