President blong Vanuatu, Pastor Obed Moses Talis i kwestenem wok blong Malvatumauri council blong ol jifs long constitution Dei.

President Obed i talem se hao nao bambae Malvatumauri National council blong ol jifs i mekem wok blong hem sapos i nokat wan President sins namba 6 long manis May 2018 kasem naoia.

Hemi talem se folem konsititusen chapta 5, kavman i should mekem election insaed long 3 manis blong elektem wan niufala President blong Malvatumauri National council.

Mr Obed i talem se naoia five manis i pass be eleksen blong wan niufala president i no tekem ples yiet, mo hemia i brekem mama loa.

Hemi talem se i impoten blong eksekutif hemi mas luk save ol pillar stone we nation blong Vanuatu i stanap long hem mo mama loa tu i talem.

Hemi talem tu se hemi diuti blong Gavman blong mekem election blong electem wan President blong tekemap konstitiusionol ofis blong malvatumauri council blong olgeta jif blong olgeta oli save wok gud blong protectem mo upholdem ol traditional values blong umi.