Fiji Airways Drua tim i menteinem unbetean run long home afta long 40-35 viktri ova long Canberra Vikings long raon six blong Nasonal Ragbi Jampionsip we i tekem ples long Churchill Park, Lautoka.
Drua saed i skorem 5 try long fes haf mo hemi lid long 33-14 bifo kem i go long brek.
Winning try i kam long Levani Kurumundu long 60 minit blong kem.
Apisalome Waqatabu mo Levani Kurumudu i skorem 2 try long kem ia.
Nomata long viktri blong Fiji ia be i gat sam konsen se hemi no save menteinem konsistensi long seken haf taem Canberra Vikings i krosem laen 3 taem.
Long las yia ol Vikings i trashem Drua long wan hevi sko blong 66-5.
Drua i continue lidim NRC tebol wetem 23 poin from hemi no lusum wan match yet kasem las wiken.
Fiji Drua bae i fesem Western Force blong Australia long Satede aftanun long wiken we i stap kam.