Ministri blong Education i talem se ol skul ino mas jarjem eni kontribusen fee, fundresing fee or eni nara fee long ol piknini blong Ambae we ol parents blong olketa oli bin ol fama long aelan blong Ambae.
Mo hemia i folem disisen we Kounsel blong ol minista ibin tekem blong ol piknini blong Ambae we ol parents blong olketa ibin liv long Ambae, mo oli part long evacuation blong ol pipol blong Ambae, bae oli no pem skul fee.
Akting Direkta General blong Education, Bergmans Iati i talem se hemi impoten blong ol skul prinsipal i fulmap ol infomesen abaut ol studen blong Ambae long ol skul blong olketa, mo putum long Open VEMIS form, mo putum iko bifo namba 17 Oktoba 2018.
Hemi talem se Ministri blong Education mo Trening hemi mas karem ol infomesen ia bifo i kat transfer blong ol grant mo ol skul fee subsidi long ol skul.