Ofisol opening blong niufala mo pemanen grand stand blong Laminu Stadium long Tanna i tekem ples long Tafea Day long tusde long wik ia.
Grand stand ia i karem facelift tru long Loli Construction mo wan narafala konstraksen kampani long Tanna.
Tufala kampani ia i winim tenda long kavman blong bildim niufala grand stand anda long projek blong afta Pam rikonstraksen.
Ripot long Tanna i talem se disaen mo konstraksen blong grand stand ia i moa strong kompea long fes wan we saeklon Pam i distroem.
Hemi no festaem blong Laminu Stadium grand stand i ripea, hemi bin go tru long sam rikonstraksen finis sins kavman i bildim festaem long 1986 blong hostem namba 3 Inter District Games.