Ministri blong Jastis mo Community Services i putum finis kopi blong Criminal Task Fos ripot blong VNPF, mo EDF9 or European Development Fand 9, iko long ofis blong Pablik Prosecutor blong tekem aksen long hem.
Akting Direkta General blong Ministri blong Jastis, Pacco Siri, i talem long wan press rilis se ol ripot ia iko long ofis blong Pablik Prosecutor, afta we kounsel blong ol minista i apruvum ol recommendation we i stap insaed long ripot ia.
Mr Siri i talem se kopi blong ol ripot ia oli kivim tu long polis mo ol nara agensi, olsem we i stap insaed long ol recommendation blong ripot ia.
Mr Siri i talem se Ofis blong Pablik Prosecutor i advisem Ministri blong Jastis long las wik se oli stat blong wok long tufala ripot ia, mo bae oli wok wetem ol investigator.
Mo taem we ol file i redi mo i kat pruv long tufala ripot ia, bae olketa we oli involve long tufala ripot ia bae oli pas long kot.
Be long semtaem, Mr Siri i talem se pipol ino shud mekem ol erli konklusen long kes ia, be leko ol law enfosmen agensi oli deal wetem mata ia, olsem we loa i talem.
VNPF ripot ia hemi abaut sam asset blong VNPF we hemi pem olsem ol projekt, long sam yia i pas be ino mekem mane.
Mo blong EDF9 ripot hemi abaut alleged misuse fund ia, EDF9, we hemi blong apgredem rurol elektrifikeson long Sola long Vanua Lava, East Ambae, mo Malekula.