Famli blong Hed blong Komonwelt blong ol Kaontri, we Vanuatu emi pat long hem, Queen Elizabeth II blong Great Britain, emi anaonsem yestedei se oli stap ekspektem wan moa baby.
Duke mo Duchess blong Sussex, Prince Harry wetem wife blong hem, Meghan Markle, i anaonsem long pablik media, long yestedei, se tufala i stap ekspektem fes baby blong tufala long Spring next yia, 2019.
Long anaonsmen blong tufala ia, couple i talem se tufala i apresietem ol sapot we i kam long tufala from ol pipol raon long wol, sins mared blong tufala long May, yia ia.
Mo tufala i hapi blong save sherem hapi news blong tufala wetem pablik.
Prince Harry mo Duchess Meghan bambae tufala i stap rere tu blong travel i kam long Pasifik long ol wik we i stap kam, blong fes eva visit blong tufala i kam long rijen.
Bambae tufala i stat long Australia, go long Fiji, then Tonga, mo New Zealand, bifo tufala i go bak long Britain.
Spekulesen long pablik i talem se emi mos laekli se baby bambae emi bon long midel o leit April, 2019, from oli talem se usuali famli ia i stap anaosem ol new baby long 3 manis bifo baby i bon.