Sam wokman blong Vanuatu we oli bin ko wok long wan farm long Australia, oli winim kes blong olketa, afta we oli bin kleim abaut nogud tritmen we oli bin fesem.
Long May, Fairfax Media i rivilim se 50 wokman blong Vanuatu ibin wok anda long sam nogud kondisen long wan fam kolosap long Shepparton, mo oli bin kasem smol mane nomo, we hemi abaut 8 dola long wan hour.
Mo sam long ol wokman ia ibin ripotem se blad ibin kamaut long nose mo ear blong olketa, afta we oli bin expose long kemikel taem we oli stap pikimap tomato long farm.
Sydney Morning Herald niuspepa blong Australia i ripotem se 5 long ol wokman ia ibin tekem legal aksen agensem Agri Labour Australia we i beis long Brisbane, mo kampani i akri blong setelem long wan amount blong 150-tausen Australia dola, we hemi ova long 12 million vatu.
Mo mane ia hemi blong olketa 5 we oli kleim.
Niuspepa i ripotem se amount blong mane ia hemi double long amount we i kat allegation se oli bin stap kasem we hemi underpaid, long 4 manis we oli bin wok long MCG Fresh Produce Arm long west blong Shepparton.
Niuspepa i talem se settlement ia hemi blong avoidem or mekem se ino kat wan long fala kot kes, we bae i possible blong i kat millions of dolla we Agri Labour i mas pem.
Wan long ol 5 wokman ia,  Tulia Roqara i talem se hemi hapi long result ia, be hemi wantem blong oli extendem iko long everiwan long farm ia we oli bin underpaid.
Hemi talem se famili blong hem ibin talem se kleim blong hem i kat smol janis, mo hemi wan dream nomo.
Tulia i talem se long Vanuatu, oli no stap kleim from bik amaunt blong mane olsem, mo long olketa hemia i wan dream.
Be hemi talem se most impoten samting long kes ia hemi no abaut mane, be hemi blong kasem sem rait olsem ol pipol blong Australia.