Cristiano Ronaldo i talem long wan pres konfrens long wik ia se ol loya blong hem i gat konfidens blong winim kot keis long ol alegesen blong rape we i go akensem hem.
Ripot i talem se Ronaldo i luk hapi taem hemi stap ansarem ol kwesten long Juventus nius konfrens.
Kathryn Mayorga i mekem alegesen se foma Real Madrid pleia ia i reipem hem long wan hotel long Las Vegas long 2009.
Man Portugal ia i dinaem ol alegesen we i go akensem hem.
Cristiano Ronaldo i mekem toktok ia bifo hemi fesem foma klab blong hem, Manchester United long UEFA Champions League.
Hemi se evritaem hemi soem exampol insaed mo aotsaed long fil.
Wan German wikli nius pepa i feswan blong pablisim stori abaot alegesen ia mo hemi talem tu se long 2010, woman we i mekem alegesen i talem se hemi setelem keis ia aotsaed long kot long wan amaon blong 375,000 US dollars.