Weta situeson we i stap long Vanuatu tedei, i kosem bikfala problem long ol pipol blong Ambae we oli liv anda long ol tent long Maewo.
Jeaman blong kaonsel blong ol jif blong Ambae long Maewo long Nasawa, Colton Bani, i konfemem long VBTC nius se hemi sad blong lukim tritmen long olketa.
Hemi kleim se kasem naoia, shelta klasta blong Nasenal Disasta Manejmen Ofis i no visitim biges evakueson senta long Maewo blong lukim situeson we oli fesem.
Long narasaed, Provinsol Lieson Ofisa blong NDMO we i stap naoia long Maewo, Philip Meto, i talem long VBTC nius se situeson blong wetwet ia hemi nogud tumas olsem we oli risivim long ripot blong klasta.
Mr Meto, i talem se shelta klasta i stap wokem ol shelta long niufala graon.
Jif Colton Bani, i talem se Red Cross i givim sam tent we oli yusum blong bildim kitjin blong kuk andanit long hem.