Polis i askem long pablik long Port Vila blong tekem plante kea long taem blong Fest Napuan long Port Vila.
Media Senta blong polis i talem se pipol i mas tekem plante kea, from tedei i kat ol domestic violence isu we i kam antap, i kat plante yang pipol oli involve blong smokem maniwana, i kat ol steal, i kat ol man i drong long pablik ples, mo i kat ol isu blong traffik we i kam antap plante.
Polis i talem se ol nogud fasin olsem bae iko hed, mo hemi impoten blong wanwan man i tekem responsibiliti blong lukoutem hem wan.
Polis i askem ol parents blong toktok plante long ol piknini blong olketa, bifo oli ko aut blong enjoyem olketa long musik festival ia.
Mo toktok iko long ol mama mo ol yang kel blong stap seif, mo wokabaut wetem wan adult or bik man oltaem.
Polis bae i mekem sua se loa mo oda i stap oltaem tru aut long event ia, mo eni wan we i brekem loa ia bae polis i deal wetem hem.
Namba 22 edition blong Fest Napuan i stat long yestedei, wetem Fest Nalenga, mo long tedei kasem Satedei 27 Oktoba, hemi Fest Napuan.