Vanuatu i stap olsem pemanen opereting beis blong sevelens plen blong Australia blong karem aot sevelens opereson long 200 Ekonomik Exklusiv Zon EEZ blong Vanuatu mo ol nara kantri akros long westen mo sentrol pasifik.
Dipatmen blong Difens blong Australia i fandem sivilian eriol sevelens sevis ia long Pasifik mo hemi wan 30 yia komitmen blong gavman blong Australia long rejinol maritaem sevelens opereson.
Pasifik Aelans Forom Fisari Ejensi i kat operesenol kontrol blong eriol sevelens ia, blong mekem se ol opereson blong maritaem sevelens ia i hapen long ful kapasiti blong hem.
PMSP eriol sevelens bae i sapotem tageted, intelijens-driven maritaem patrol mo enhansem kapasiti blong ol kantri long pasifik blong faenem ol fising aktiviti we i no folem loa insaed long EEZ.
I kat 3 pat blong karem aot bifo i kam ful operesenol.
Fes pat blong eriol sevelens ia komplitim mo inkludum ol flaet blong testem komunikeson mo sevelens proses mo asesmen blong ol eapot blong rijon.
Namba 2 pat bambae hemi inkludum pemanen beis blong King Air 200 eakraft mo provison blong 1000 flaet haoa we Forom Fisari Ejensi i kodinetem.
Darekta blong Dipatmen blong Fisari blong Vanuatu, Kalo Pakoa, i talem se plen ia ba ei givhan bikwan long ol wok blong Fisari blong kantri.
Polis Inspekta blong Maritaem Sevelens senta, Dickson Siba, i talem se pepes blong plen ia i kam long Vanuatu, hemi blong givhan long patrol bot blong kantri we hemi RVS Tukoro.