Hemi markem 38 yia after long Independance we Torba Provins i save holem chair blong President blong Malvatumauri Kansel blong ol jif.
Mo hemia i wan bigfala achivement mo milestone long development blong provins ia blong save holem title blong President blong Malvatumauri.
Member blong parliament blong Torba, Christopher Emelee, i talemaut yesterdei afta long eleksen ia, long bihaf blong Vanuatu Kavman mo pipol blong Torba, se oli luk save trust blong ol elected member blong kansel blong save electem Jif Willy Plasua olsem President blong Malvatumauri Kansel blong ol jif.
Hemi talem se, niu President blong Malvatumauri we i kamaut long Gaua aelan, i changem ol tingting we pipol ibin stap kat long ol yia we i pas se Torba hemi las wan, be naoia Torba i kam fes wan.
MP Emelee i talem bigfala thank you long former President blong Malvatumauri, Jif Senimao Tirsupe long gudfala wok we hemi mekem, mo save handem over position ia i go long new elected President, Jif Willy Plasua.
Hemi talem tu se hemi wan dream kam tru blong ol pipol blong Torba blong save tekem lidaship role long kounsel blong Malvatumauri.