Weit lifting i gat big potensol long Vanuatu mo i nidim blong federesen i mas wok plante blong mekem i kam antap.

Intertim presiden blong Vanuatu Weigth Lifting, Bae Williams Worwor i mekem toktok ia wetem VBTC spot taem oli stap go raon long Port Vila long wik ia blong karemaot talent identification prokram.

William Worwor i talem se spos ol nara Melanesian kantri i gud long spot ia from wanem Vanuatu i no save mekem kasem level we oli stap long hem.

Hemi admitim se Vanuatu Weight Lifting Federation i bin ded blong plante yia be wetem interim komiti we hemi lidim bambae hemi mekem sua se spot ia i kam laef mo stap long kantri.

Long wik ia two weit lifta blong Fiji i stap long Vanuatu blong help mekem spot disiplin ia i kam bak laef mo priority naoia i blong identifaem sam lifta blong oli stat tren from 2019 Pacific Games.

Afta long 2017 mini kems, Vanuatu i gat fulap niu mo profesonal weit lifting ekwipmen we i stap nating mo i abaot taem blong yusum olketa.