Ol pipol blong West Ambae mo Saot Ambae i stap lo imejensi nid naoia afta long hevi fol blong asis blong Manaro volkenu long las wik kasem long Sande we i jas pas.

VBTC nius i witnesem distrktiv damej we i stap biyon diskason mo ol pipol i nidim help kuiktaem.

Ashfol i kosem damej long kakae, vejiteson, kash krop, animol, wota mo ol nara samting we pipol i rilae long hem.
 
Wan tim we i tekem tuketa Palementri Sekreteri long ofis blong Praem Minista, MP Johnny Koanapo, MP Jacob Mata mo MP Alicksdon Vira oli bin stap long wan eria sevei bifo oli ko long graon blong lukim feshan infomeson long ol damej we i hevi ashfol i kosem.

Hevi ashfol ia i kosem tu samfala haos we oli bildim long lokol materiol oli foldaon. Ol hevi tick ashfol i i mekem se ol pipol i no save faenem ol drae kokokas long West Ambae espeseli ol vilij we oli stap inland.

Tim i bin travel long rod mo lukim ol damej we ashfol i kosem mo wetem toktok we VBTC nius i bin mekem tru long wan intaviu,
Ash fol ia i hevi long inland i ko kasem long kostol eria blong West Ambae iven i ko kasem ol sef-zon olsem long ol eria blong Walaha mo Vilakalaka.
Long Saot Ambae, VBTC nius i witnesem se kala blong ol riva i waet olsem milk mo solwota long Saot Ambae i braon long risalt blong riva i wasem ol ashfol i ko long solwota.
Ol pipol blong Saot mo West Ambae i nidim ejen help long saed blong kakae mo wota mo laef blong ol animol blong olketa i stap naoia long denja.

VBTC nius i andastandem se Asesmen tim blong NDMO i ko long Ambae long Tumoro Tosde namba 22 March blong mekem ditel asesmen bifo nasenal gavman i tekem nekis step blong givhan long ol pipol blong Ambae.