Minista blong Helt, Jack Norris Kalmet i officiali lonjem trial blong ol drone blong karem ol medesin iko long ol remote aelan, long yestete moning long north Efate.
Event ia i tekem ples long olfala Takara strip.
Minista Kalmet i talem se wetem ol developmen plan blong Vanuatu, kavman i mas finem ol wei blong kasem ol piknini long ol komuniti long ol remote aelan.
Hemi talem se hemi wan proud dei blong Vanuatu blong lonjem drone trial ia, anda long ol commercial kontrakt, we bae i help blong mekem se medesin blong seifem laef blong ol piknini, i kasem ol aelan.
Kavman blong Vanuatu i kivim 3 komersial kontrakt iko long 2 drone kampani, we hemi Swoop Aero Pty Limited blong Melbourne, Australia, mo Wingcopter Holding GmbH and Company blong Germany, blong help putum ol medesin long ol remote aelan.
UNICEF Pacific representative, Sheldon Yett i talem se olketa i proud blong sapotem kavman blong finem ol niu wei blong mekem se ol medesin i kasem ples we oli shud ko long hem.
Drone trial ia i tekem ples stat long tedei kasem long namba 7 Disemba, mo bae oli flai long olfala Takara airstrip long north Efate iko kasem Emau, Pele mo Ngung aelan, we hemi wan distance blong 50 kilomita.
Folem trial ia, bae Minstri blong Helt mo Civil Aviation Authority i lukluk blong apruvum use blong drone blong putum ol medesin long ol helt fasiliti long Epi, Shepherds grup, Erromango mo Pentecost stat long January 2019.
Mo kavman blong Vanuatu bae i kat wan gud understanding olsem wanem oli save usum drone long ol nara sekta long kantri.
Chief Innovation Ofisa blong Dipatmen blong Foren Afea mo Trade blong Australia, Dokta Sarah Pearson i talem se olketa i luk forward blong lan long trial ia, mo kam blong understandem olsem wanem use blong drones i save help blong preventem wan sik, long wan remote area.
Olketa we oli tekem lid long drone projekt ia hemi Ministri blong Helt, mo Civil Aviation Authoriti blong Vanuatu, wetem sapot we i kam long dipatmen blong foren afea mo trade blong Australia, mo Global Fund blong faitem sik Aids, TB mo malaria.