Fes eva bilding blong ol pikinini we i no kat papa mo mama or ol orphans, i open yestete long Eratap vilaj long Efate.
Bilding ia bae hemi olsem wan learning senta blong ol piknini ia, mo hemi wan foundesen we bae i saenem laet long isu blong Orphan or ol piknini we oli no kat papa mo mama long Vanuatu.
Mind behaen long Orphanage bilding ia, Reverand Peter Isaac, olsem distrikt suprintendent blong NAZARENE joj long Vanuatu, i talem se i kat bik nid blong kat wan bilding olsem long kantri.
Mane blong projek ia i kam long Daerekta blong Eramus institute of peace studies, mo semtaem jeaman blong Kobe international sapoting okonaesesen, Reverand Yoshio Iwamuru, blong Japan.
Rev. Iwamuru i ripotem long VBTC nius se tinktink blong fandem wan projekt olsem, i stat taem hemi bin kam long Vanuatu long taem blong saeklon Pam long 2015, mo i luk bik nid blong kat wan bilding olsem blong seifem ol pikinini we ino kat ples blong ko, mo oli no kat papa mo mama.
Mane blong bildin ia i kasem araon long 1 milien vatu.