Meteo mo Geo-hazard Dipatmen i ripotem se Tafea provins nomo ibin kasem threat blong tsunami, folem earthquake we shekem Loyalty aelan long New Caledonia long yestete afternoon.
Meteo mo Geo-Hazards department i ripotem se ol nara provins oli no kasem tsunami threat from earthquake ia.
Meteo dipatmen i talem se ol aelan long south blong kantri oli kasem threat from oli stap kolosap long New Caledonia.
Dipatmen i ripotem se pawa blong earthquake ia i kasem 7.6 magnitude.
VBTC News i kasem information tu se Pacific Tsunami Warning center i givim ol informations tu i kam long Vanuatu mo hemi especially now long Tafea provins se bae oli lukim sam change long solwota.
VBTC News i kasem infomesen long Aneityum mo Aniwa se oli bin luk sam jenj long solwora, mo pipol ibin muv iko inland mo antap long hill.
Meteo dipartmen i advisem pipol blong no frait mo sapos i kat eni threat o danger long ol nara aelan bambae oli givim apdeit long hem.