Mele Eels Gold woman ragbi lik tim i tekemaot fesfala 2018 Women's 9s grand final taetol.
Grand final blong 2018 Women's 9s i tekem ples long Mele field long Sarere mo Port Vila Power House mo Mele Eels Gold tim i battle aot mo Eels i lid long 8-0 bifo kem i go long spell.
Long saed blong Power House, hemi mekem wan shaky stat i mekem se hemi no bin save sko long fes raon.
Hemi kam bak strong mo luk solid long afta spell, taem hemi aplaem gud presa long attack mo difens we i help blong hemi skorem fes try.
Winger mo pleia blong match blong Mele Eels, Alvina Chilia i skorem wan long range try blong finisim kem ia long 12 points to 4.
Long dei ia tu i gat 2 curtain raiser match taem Mele Blue mo Blue Machine i plei from namba 3 mo 4 ples.
Blue Machine i tekem lid long 10-0 be Mele Blue i kam from bihaen mo winim match ia long 14-10 faenol sko.
Long opening match blong dei, Pango Green Birds i difitim Port Vila Barbarians tim long 20 points to 4.