Vanuatu Broadcasting & Television Corporation [ VBTC ] i sekiurem exclusive television raet long Vanuatu teritory blong brodkastem live, HSBC World Rugby Sevens Series.
Hemia i minim se Television blong Vanuatu hemi only television aotlet we International Rugby Board [ IRB ] i laensensem blong televaesem evri 10 raon blong World Rugby Sevens Series long Vanuatu.
Series ia i stat long end blong Novemba long Dubai mo jampion blong hem, hemi South Africa.
Long las wiken series ia i go long Cape Town, South Africa mo Fiji i kam jampion blong hem.
Long January bae oli plei long Hamilton, New Zealand, February long Sydney, March long Las Vegas, Vancouver long sem manis, Hong Kong 7s long manis Eprel, Singapore, London mo Paris sevens long June 2019.
VBTC i stap infomem evriwan se hemi provaedem free to air channel mo TBV pipol i save aksesem long Channel 25 long Canal-Plus long digital.
Jif exekutiv ofisa blong VBTC, Francis Herman i talem se bambae kampani bae i gohed blong mekem ethical wok folem loa blong karem raet blong brodkastem popular sporting events long kantri.
Hemi se bambae ol viua blong TBV i save wajem i no longtaem kriket, basketbol, hoki mo nara spot we i niu long Vanuatu.