Malampa Revivors i promes blong inkrisim pefomens blong hem long Champions League kompetisen we bambae i kikof long nekis manis.
Jeneral kodineta blong Malampa Revivors, Jacques Tronquet i talem toktok ia taem klab i rivisim faenansel sapot long 500,000 vatu long MP blong Luganville taon, Matai Seremaiah Nawalu long las wik.
Mr Tronquet i talem se klab i go long Oceania Champions League long seken taem wetem bigfala tingting blong mekem i moa gud long fes apierens blong hem long two yia i pass.
Long saed blong hem, MP Matai Seremaiah i asurem klab se hemi fes help blong hem mo bae hemi kivim tu 50,000 vatu spos klab i skorem wan poin.
Hemi adem se bambae hemi stanbae blong kivim nara 500,000 vatu spos Malampa Revivors i mekem i go long seken steij blong tunamen.
Malampa Revivors bae i travel i kam long Port Vila long wik ia mo pleim sam frenli match bifo hemi go long Champions League long Kone, New Caledonia.
Klab ia bae i camp long VFF academy long Teouma eria.