Vanuatu futbol star, Bong Kalo bae i joinem jampion klab blong Fiji, Lautoka FC long haf blong 2018-2019 futbol sisen.
Fiji Times nius pepa i ripotem se Kalo i wan long trifala niu pleia we oli saenem mo bambae i help liftimap pefomens blong Lautoka FC long Oceania Champions League mo seken haf blong Fiji FA futbol sisen.
Vanuatu utility midfilda ia i expektem blong fomem wan gud kombinesen wetem Benjamin Totori blong Solomon Islands mo nara wipon straeka blong klab ia.
VBTC spot i kasem ripot se Bong Kalo i raet i go long manejmen blong Ifira Black Bird finis folem intensen blong hem ia mo long semtaem hemi askem Vanuatu Football blong priperem intanasonal transfe setifiket [ITC] blong hem.
Lautoka bae i hostem Pool B match blong Champions League long nekis manis.