I kat wan new security company we i stap operate naoia long Port Vila mo hemi stap focus blong recruitim ol securities blong hem we oli bae oli ko tru long wan high intensive police mo military training long end blong manis ya.

John Mark Bell we hemi wan foma police force Captain hemi talem se Protection.vu hemi name blong security firm ya mo hemi stap lukluk blong leftemap skills blong ol security long Vanuatu we oli interest blong joinem firm blong hem.

Mr Bell hemi talem se Protection.vu hemi kat wan strong relationship wetem Protection.nz long New Zealand mo Protection.fr we i base long Franis mo tufala security company ya ol former police mo military man blong Franis nao oli ownem.

Hemi talem se long end blong manis ya bae sam former French police mo military man bae oli kam ranem fes training blong 12 security officers blong Protection.vu.

Hemi talem se hemi bin stap toktok wetem olketa longtime finis mo loia blong olketa hemi draftem wan law mo sentem ikam mo hemi karem iko kivim long Chairman blong Police Service Commission Willie Vira mo oli putum long olgeta long translation oli stap transletem.

Hemi talem se hemi likely se after long translation blong loa ya bae oli passem iko long Minista blong Internal Affairs blong presentem long Parliament olsem wan bill.

Mr Bell hemi talem se bae oli askem wan memorandum wetem National Police  blong Vanuatu blong ol members blong Protection.vu oli save help long ol taem bong disasta mo long taem blong ol civil unrest.

Hemi talem se after long ol training we bae ol security blong hem bae oli ko true long hem, bae oli signem wan ethical code blong security blong certifyem se oli bin ko tru long wan high training blong ol future recommendation.

Hemi talem se Protection.vu hemi stap operate vinis long Vanuatu mo olketa nao oli bin providem security long taem blong South Pacific Mini Games mo oli stap yet naoia long Korman complex blong mentainem place i klin mo safe oltaem.