Afta long Exams results blong olgeta yia 10, fulap long ol parents oli no hapi long namba blong ol students we oli selectem olgeta blong ko long ol difren skuls within long Vanuatu.
Wan long olgeta Konsen parent blong Pentecost  i talem se kavman i nid blong putum in mo senior cycle long ol skuls we oli operate vnis.
Hemi putum example long Malampa provins we i gat fulap skul be i gat nomo wan senior cycle we hemi Rensarie college.
Konsen papa ia i talem se tedei fulap students oli mekem gud long exams blong olgeta, be wetem smol namba blong ol senior skul long Vanuatu i no allowem olgeta blong kontinu wetem stadi blong olgeta.
Hemi call i ko long kavman thru long Ministri blong Education blong mas wok tugeta wetem ol difren skul blong setemap moa senior cycle long ol existing secondary skul we i stap vinis.
From wetem smol namba blong ol senior cycle i mekem se tedei fulap students oli left aot mo no save kontinu i ko long senior level.
Long respond, Ministri blong Education i talem se i tru, i gat lack of space from fulap reason. Wan long olgeta reasons nao hemi finance, i nokat enaf mani blong save extendem ol existing secondary skul i ko long senior cycle.
Ministri blong Education i talem se i stap wok naoia blong kam ap wetem wan plan we bai i addressem issue ia.