Tufala Vanuatu nasonal soka pleia, Kensi Tangis mo John Alick i go bak long Honiara, Solomon Warriors long tede afta long krismas mo niu yia holide we tufala i kam spendem long kantri.

VBTC spot i stap long eapot mo witnesem dipaja blong tufala pleia long tede moning.

Utility midfilda blong Solomon Warriors, John Alick i talem long VBTC nius se tufala i luk fowod blong sapotem klab we tufala i gat kontrak wetem blong mekem i moa gud kompea long las two sisen.

Alick we i spendem two season wetem Warriors i se offer we klab ia i kivim long tufala i gud mo bambae oli faet strong long home kraon blong go kasem semi mo faenol blong tunamen.

Long saed blong hem, straeka Kensi Tangis we i winim golden boot awod long las sisen i talem se hemi praod Ni-Vanuatu blong winim wan awod long wan foren kantri.

Tangis i gohed blong talem se pefomens blong tufala long jampion klab blong Solomon Islands ia i sapraesem pipol mo hemi soem se Vanuatu i gat oltaem ol kwaliti mo skillfull soka pleia.

Kensi Tangis i plei long Champions League klosap 10 taem mo John Alick hemi 4 taem blong hem.

Kontrak blong tufala pleia wetem Solomon Warriors i blong wan season nomo mo bae i end afta long Champions League.