Vanuatu Broadcasting mo Television Corporation, VBTC, bae i holem Open dei blong hem long Thasdei  22 March kasem Satedei 24 March, 2018, mo hemi invitem pablik blong visitim Broadcast Haus.

Open dei ia hemi wan janis blong ol pipol i luk olsem wanem Vanuatu nasonal broadcast servis hemi operatem radio mo TV blong hem.
Ol visita we oli kam long Broadcast Haus bae oli mitim ol radio mo TV staff, kat janis blong serem tingting long radio mo TV,  luk ol equipmen, mo witnesem fes han transformation we i stap tekem ples naoia long VBTC.

Bae i gud tumas blong ol piknini oli visitim Broadcast haus mo lanem moa abaut nasonal broadcast.  Mo tu blong ko long studio mo witnesem ol laef show blong Radio Vanuatu mo Paradise FM.
Joinem ol discussion long Television blong Vanuatu, mo luk ol journalist oli presentem nius laef, mo experiensem outsaed broadcast trak laef in aksen.
Bae i kat laef entertainment tru aut long tri fala dei ia, mo bae i kat sausage sizzle blong kivimaut blong kakai.
Everi piknini we i visitim Broadcast Haus bae iko hom wetem wan smol present.

Chief Executive Ofisa blong VBTC, Francis Herman i talem se hemi impoten blong nasonal broadcasting servis hemi re-konekt wetem audience.
Hemi talem se wan effektiv nasonal pablik broadcaster i save fasiliteitem mo strengthenem improved governance mo deliveri long essential servis, so VBTC i stap mekem everi effort blong winim bak ol heart mo sapot blong ol pipol blong Vanuatu.

Mr Herman i talem se wok i stat finis blong transformem VBTC i kam wan respekted, responsible mo sustainable nasonal institution, we bae i mekem hemi wan senta blong excellence mo best praktis, mo invitation iko long ol pablik blong kam visitim Broadcast Haus mo luk fes phase blong ol jenis ia.
Open Dei ia bae i stat long 8 oklok long morning kasem long haf-past-4 long aftenun.