Gavman blong Vanuatu i saenem wan agrimen blong ova 3 bilion Vatu wetem European Union.

Vanuatu i saen wetem European Union long wan prokram blong mekem i strong agrikaljarol prodak long kantri.

Praem Minista Charlot Salwai Tabimasmas we i stap naoia long Brussels, mo hemi saenem Vanuatu Valiu Jen Prokram agrimen wetem European Komisina blong Intanasenal Kopereson mo Divelopmen, Neven Mimica.

Prokram ia, i eim blong promotem wan strong, klaemet-resilien rurol ekonomi blong helpem Vanuatu i rikava long tropikol saeklon pam long 2015.

Intanasenal Kopereson mo Divelopmen i ofarem 3 bilion, 175 milion mo 800,000 Vatu blong mekem i strong valiu jen long stratejik ekonomi blong Vanuatu olsem kokonat, bif, ol frut mo vejitebol.

Ol eria ia, oli selektem folem potensol inkam blong ol fama mo emploement, divelopmen inpakt we i link wetem manufakjaring mo turisim.

Wan steitmen we i kam long European Union i talem se prokram ia bae i hapen long 6 provins blong Vanuatu.

Komisina Mimica i talem se inisietiv ia bae i sapotem smolholda famas blong impruvum sefti mo kualiti blong ki expot krop taem oli promotem klaemet resilient prodakson mo tred.