Vanuatu bae i hostem 2018 ITTF Oceania Tour long Port Vila hemia long Sarere mo Sande long wiken ia.
I gat six kantri we bambae oli kompit long two dei rejinol tebol tenis tunamen mo hemi kwalifikesen blong 2019 Pacific Cup we bambae i tekples long Bora Bora long Tahiti.
Anolyn Lulu long Vanuatu Table Tennis Federation i ripotem long VBTC nius se Vanuatu bae i filtim 11 pleia long kompetisen long difren age grup mo sam long olketa i festaem blong oli plei akensem ol pleia ovasi.
Ms Lulu i se ol kantri olsem Fiji, Tonga, New Caledonia mo Vanuatu i yusum tunamen ia olsem part long preparesen blong ol from Pacific Games long Apia Samoa long manis Julae yia ia.
Australia, New Zealand, Fiji, Tonga mo New Caledonia bae oli kasem kantri long tumoro mo kompetisen bae i stap long Korman.
Pablik i welkam blong go wajem mo kivim sapot long ol Vanuatu tenis pleia long tufala dei ia.