Wan energy projekt blong kavman long yia ia, bae i mekem se i kat elektrisiti long sam part blong Malekula mo Santo.
Vanuatu Projekt Management Unit i ripotem se anda long projekt ia, bae i kat upgrade wok long Brenwei Hydro, bae oli bildim 400 kilo Watt hydro pawa plant long hem, wan 2 kilomita rod, 21 kilomita transmission line mo wan pawa haus.
Hemia i minim se bae i kat klin elektrik pawa iko long ol vilaj long area blong Brenwei, Unmet iko kasem long Leviamp, iko kasem Lambubu mo Laravet.
Mo area we bae ol kasem elektrisi long Malekula bae i kasem araun 90 pesent.
Long Santo bae i kat ol cable blong kivim elektrik, we bae oli putum long Turtle Bay iko kasem long Port Olry,  mo hemia bae i mekem se fulap long ol vilaj long east coast blong Santo bae oli kat elektrisi.
VPMU i ripotem se mane blong projekt ia hemi tru long wan loan mo grant we i stap between kavman blong Vanuatu, Asian Development Bank, mo Strategic Climate Fund.
Mane blong projekt ia hemi araun 1.5 BILLION vatu.
ADB i help wetem wan loan blong 250 million vatu, Strategic Climate Fund i kivim araun 700 million vatu, mo kavman blong Vanuatu bae i kivim araun 550 million vatu.
VPMU i talem se tenda from projekt ia bae iko aut ino long taem, mo bae i klos long erli long April 2019.