Ol test we dipatmen blong wota risos i stap kontaktem, i stap konfemem se ol pipol we i kontinu blong swim long solwora long Port Vila haba, we i kat tabu or ban long hem, i kat hae risk blong kasem ol skin disis.
Wan ofisa long Wota Risos Dipatmen,  Erie Sammi, i konfem long VBTC nius se testing we oli stap kontaktem i pruvum se wota long aria blong maket haus hemi doti tumas,  mo level blong bakteria emi hae long em folem bikfala waste blong pipol mo animol we i stap ko daon long solwota long aria ia.
Hemi talem se area blong wota long Tebakor,  i kat hae namba blong bakteria tuu.
Mr Sammi i kol long ol otoriti konsen blong oli mas wok tuketa blong inspektem ol seawage sistem long Vila taon, inspektem ol tritmen plan, ol septik sistem mo pablik drenej, blong mekem sua se everi samting i mas folem wan guidelaen mo standed we i stap blong adresem bik amaunt blong pulusen or doti we i stap ko daon long solwora.