Nius long Oceania Champions League,

 

Dei two blong grup steij kompetisen blong Group A mo B i tekem ples yestede mo aotkam blong fofala mats i soem sam tim i advans i go long kwota faenol, sam i rilae long las mats mo i gat samfala i aot long tunamen nomata oli gat las mats blong pleim yet long Sarere wiken ia.

 

Long Group B risal long Fiji, AS Central, Lautoka mo Henderson Eels i still stap long pole posisen blong kwota faenol mo oli rilae long las mats long wiken ia.

 

AS Central i mekem wan konvins win ova long Morobe Wawens long 7-0 mo hemi putum wan leg blong hem i go insaed long kwota faenol.

 

Henderson Eels i apsetem Lautoka FC long 6-5 blong kipim hope blong hem i laef long las 8 blong kompetisen.

 

Klasmen long Group B naoia i putum AS Central blong Tahiti i topem wetem 6 poin, Lautoka 3, Henderson 3 mo FC Morobe Wawens 0.

 

Long Group A long New Caledonia, Hienghene Sport blong New Caledonia i feswan blong kasem kwota faenol afta long 1- nil akensem AS Tefana blong Tahiti.

 

Long narafala match, Lae City Dwellers i kipim hope blong hem i laef blong go tru long seken steij blong tunamen afta we hemi kam bihaen long sko mo winim Malampa Revivors long 4-2.

 

Tebol klasmen afta long tufala mats blong yestede, Hienghene Sport i topem wetem 6 poin, Lae City Dwellers 4, AS Tefana 1 mo Malampa Revivors 0.