Champions League,
Auckland City i putum leg blong hem finis long kwota faenol blong Champions League afta long big win blong 15-0 ova long Tupapa Maraerenga long Lawson Tama Stadium yestede aftanun.
Tupapa Maraerenga i kamaot strong long difens wok blong hemlong fes haf blong kem i mekem se Auckland City i manej blong skorem 3-0.
Ol City boys i distroem system blong plei blong Tupapa Maraerenga FC mo skorem nara 12 goals long seken haftaem.
Long narafala mats, AS Magenta blong New Caledonia i kipim hope blong hem i laef yet afta long 3-0 viktri akensem ol host, Solomon Warriors.
Risal ia i openemap jans blong tuketa saed blong faet strong long las mats long wiken blong faenem ranarap long Group D kompetisen.
Richard Sele i star pleia blong AS Magenta afta we hemi skorem two poin mo putum tim blong hem i lid long 2-0 long fes haf.
Nathanael Hmaen i putum kem ia long rest, taem hemi saenem nem blong hem long namba 3 poin long seken haftaem.
Kem ia Solomon Warriors i winim two penalty be Kensi Tangis mo Tigi Molea i no save konvetem.
Tuketa tim i gat semak poin be AS Magenta i gat moa advantej from bae hemi plei Tupapa Maraerenga we hemi wan soft tim long las kem.
Long saed blong Solomon Warriors bae hemi mas mitim Auckland City long las pool mats blong hem.