Tri dei retreat blong Ministry blong yut mo spot long Port Vila long wik ia bae i help bigwan blong liftimap wok blong ministri i go long ol yang pipol blong kantri.
Hemi toktok blong Daerekta Jeneral, Henry Vira taem hemi stap adresem retreat ia we bae i finis long tedei.
DG Henry Vira i pointemaot se Ministry ia i mas jenesim fasin blong wok mo groem ol aktiviti blong hem blong sapotem yut mo spot divelopmen long kantri.
Hemi adem se Ministry i gat potensol blong mekem se kavman i luk save wok we hemi stap mekem.
Mr Vira i se retreat ia oli nidim imput blong ol provinsol ofisa blong olketa from oli wok daerek wetem pipol long rural eria.
Hemi gohed blong talem se longtaem i kam Ministry blong yut mo spot i stap wok hem wan mo retreat ia i kam blong adresem impotens blong hemi mas wok wetem nara ministry we oli wok wetem ol yu.
Hemi preisem ol stekholda we oli atendem retreat mo ol konsalten we oli helpem ministry blong disaenem niufala rod map blong hem.