United Kingdom i nominetem Vanuatu mo Fiji blong lidim ol wok blong 'blue charters' long rijon.

'Blue Charter' hemi blong mapem ol efot blong protektem solwota mo marin envaronment aot long ol tret blong klaemet jens, poluson mo ova fising.

Ol ripresentetiv blong tufala kantri ia i toktok long wan press konfrens long London long taem blong Komonwelt Hed blong ol gavman miting.

Minista blong agrikalja, rurol mo maritaem divelopmen mo nasenal disasta manejmen, Inia Seruirate, i talem se protektem solwota hemi interes blong evri kantri.

Hemi talem se oli no save dil wetem isiu blong solwota hemwan, hemi from i rilet wetem klaemet jens.

Hemi talem se ol kantri long pasifik oli safa long isiu blong klaemet jens mo ol saeklon, mo hemi talem se Blue Charter bae i tekem lukluk blong hem blong faenansem protekson mo sastenebol yus blong kostol habitats mo ekosistem.